Gen 43 | ATA | STEP | Ioxe, soli toxoxa'a muxali ne mulai mutaasou xalexalee tuatuala no lia ne Kanani mukalusi mole mu'oki'oki tani manina.

Genesis 43

Ane'i Ilai ne Aixiputo La

1 Ioxe, soli toxoxa'a muxali ne mulai mutaasou xalexalee tuatuala no lia ne Kanani mukalusi mole mu'oki'oki tani manina. 2 Iakovo ilo'a ta 'olu mi'ou la'ilali e ta 'olu milai milotonu ne Aixiputo ne mole mukalu. La sou mami'a muavuti la muvikalane'i, “Ta molomolo, ngalutu mo ngalai ngalotonenge la'ilali se'i la.”

3 Xe 'olu Iuda muavuti la muvikalanu aloxo 'o, “Ani, nexi talai. Ia aloxo nexi tevikalanenixu ne. Itema ne muvikala pekia'u noxixe lexe anu umomomo sou umaisixe lexe nexi tano'u Beniamini ulai sou umaisou, xe uasi, la anu umomomo sou nexi talai taxali noxou uasi. 4 Ia, lexe nini oponeni u'osasi mo na'italonu Beniamini ne une'esi mo noxi'a talai, la sou nexi talai sou talotonuxene la'ilali. 5 Xe uasi, la nexi umomomo sou talai uasi. Xo aloxo nexi tevikalaneni ne. Itema ne muvikala pekia'u noxixe misevile lexe anu umomomo sou umaisixe lexe nexi tano'u Beniamini ulai sou umaisou, xe uasi la anu umomomo sou nexi talai taxali noxou uasi.”

6 Xe Isilaeli muavuti la muvikalane'i aloxo 'o, “Ngingi nge'oxonu tu'umaxu ano 'o musu'asilo manina. 'Ei muvikalangengi lexe ngavikalanu itema ne lexe ngingi vivinge a muxolu no tuala?”

7 Xe ane'i miavuti la mikolinu aloxo 'o, “Ua anu umolo tali'i misevile. Mutali'isi'a ta mineminexi, xe mutali'i lexe, ‘Maminge a uxoxoolusi 'o? Mo vivinge vile la uasi?’ La sou nalomu, anu molusi mutali'isixe aloxo ne, la sou ane nexi tekolinu tali'i iou ne mukalusi. Nexi talavusou lexe anu uvikalanexi sou tano'u vivixe soxu 'o ulai sou noxi'a talai noxou uasi.”

8 Iuda muavuti la muvikalanu momu la, “Na'apixu mamu! Na'italonusi une'e noxilo mo noxi'a talai ane alalae 'osi xo loxo 'o io, nini mo nexi mo, ta 'ili'ilixe mo ta semasemamexi kalumo ne massi la nenge nenge'a tasoisoli ukalusi no 'a soli ane 'o. 9 Une'esi mo noxi'a talai. Naxavutala piena uasi, eni melo asaxila'u. Ia ulai xe namalei lexe eni alivunoxu une'e noxine uasi, la susu ane ne anu susu noxilo. Ulai la vaikalasou utelo noxilosi mole maulixo ukalu. 10 Lexe nini opoone u'osasi sou na'italonu Beniaminisi mo noxi'a talai palea, la male ano 'o ne nexi telai mo telivu mune'e alaxu tamei mukalu.”

11 Xe mami'a Isilaeli muavuti la muvikalane'i aloxo 'o, “Ioxe, nenge vote'i vile la sou tamulinu uasi, ia lexe nenge tamulinu aloxo ngelelemolu ne, la anu laixe musuku lexe ngingi ngalai, la ngatavule mimii se'i ane lailaixe musuku molu no lialia nenge 'o loxo lamalasile mo unuxu lexaxu mo mii ane tuma'u laixe sou la'ilali mo ovu vile lexaxu tuma'u lailaixe mo la'uele lailaixe mo ngataataa no tivativangenge ulai xou itema tila ne loxo lolovolo noxinge ulai noxou. 12 Mo ngano'u lamoli ane sou ngaloto no anu xe ane mulivu muai no nano no tivativangenge. Xo loxo 'o io male, ane'i ie'i si'isou la mitaataa mulivu la. 13 Ngatila'u vivinge soxu 'o mo ngapasipaa ngalivu ulai. 14 Lataua anu xaviinu musuku, molu u'oxonu itema sou anu tanungenge la, ulivunoxu Beniamini ilou Simeoni ine'e noxinge. Ia lexe Lataua umasaxa lexe eni axovulaune'i ta 'alixeni, la eni axovulaune'isi.”

15 Xe ane'i miavuti 'o la, mimolo mimii e mami'a muvikalane'ixu lexe ino'u ne mo mino'u lamoli ane sou iloto la'ilali no anu xe ane mulivu 'ole. Xe mikasi vaxa noxou Beniamini 'o la, milai ne Aixiputo. Milai xe mixali, la milai mipala'a avile noxou Iosepu iou. 16 Xe anu Iosepu mumaisou Beniamini no taine'i, la muvikalanu itema vile sou xaixai noxou e sou usaxisaxila'u taasou ne aloxo 'o, “Nano'a ta mitema 'o mo nalailixa'a no tani noxilo, xo noxi'a ta'ani no aso lixinu. Ka nalai nasa'avunoxu kau vile mo navau. Navau ukalu, la sou ulai uxutu. Xe nalalaxii la'ilali se'i sou noxi'a ta'ou ilou.”

17 Itema sou xaixai mulomu aloxo ne xe mukalu, la sou anu muno'a Iosepu ta vimovimou ne sou mulailixa'a no tani noxou vimo'a ne. 18 Muno'a sou mulailixa'a no tani, ka ane'i ne tane'i kalaua sou 'ume, tane'i mukuni lexe, “Anu a une'enenge 'o, xo tava'u no anu lamoli e mulivu mune'e no tivativanenge loxo tene'e tei. Xe, la sou itetelisinge ka ino'a ta donkimenge ilaii'a. Io sou ane'i ino'inge sou i'oxonenge taxali loxo ta mitema sou upalupalusinge sou ta'oxo'oxo mixumixu.”

19 Xe mimalei loxo 'o la itema sou xaixai noxou Iosepu e uxoxoolu no taasou sou usaxisaxila'u ane mune'e mutulu no aitenga, la sou ane'i miavuti vaxa la mivikalanu lexe, 20 “Ae, tila. Nexi tene'e alaxu vile tei sou telotonexe la'ilali lai 'o. 21 Ia telivu, la telai tema'ila no vote'i. Xe telulusou tivativanexe vilevilesi sou lexe tamaisou la'ilali e, mitaataanexe ne, la tekuluke xo lamoli e nexi vilevilesi telosi'a lapee sou la'ilali nexi teno'u 'o, ane mulivu mune'e muai no tivativanexe ne. La sou nexi tene'e 'o sou talivunoxu lamoli ane ne, 22 xe teno'u ane sou nexi talotonexe la'ilali se'i la no anu. Nexi tanexi liliu lamoli ane mulivu 'o xo, nexi talavusou itema ane mulivunoxu uasi manina.”

23 Xe anu muavuti la muvikalane'i aloxo 'o, “Ngaxavutala piena uasi. Mo nga'ume uasi. Male Lataua noxinge, anu Lataua noxou mamingesi ane mulivunoxu lamolimengi ne. Ia mii vile uasi, xo lamoli ne a eno'u.” Xe ili'i la sou mulai muno'u Simeoni sou mune'enu noxi'a.

24 Muno'u Simeoni mune'e noxi'a mukalu, la sou muolene'i sou mu'unalailixa'a no nano no tani noxou vimo'a ne. Xe muavuti la mulai mutau lexa mulailixu noxi'a sou mi'uinu tavatava'a no anu, xe mukalu la mulai mu'a'ane'i ta donkii'a. 25 Mixoxoo no nano ne sou mixoxoomaiou Iosepu sou une'e sou ilo'a i'ani, la ane'i mipitanu mimii se'i lailaixe ane ane'i mino'u no tualasi'a mune'e sou ilolovoloxu no anu.

26 Mixoxoo xe aso lixinu la anu Iosepu mune'e muxali noxi'a 'o. Xe ane'i mipasipaa 'o la, milai noxou sou milolovoloxu no anu mimii se'i e mino'u no tualasi'a mune'e. Xe miavuti la mitulutulu no tava'a vo'uvo'uxu no talaxu sou mitangatulu mulu'elai noxou sou mitoxonu. 27 Xe anu muavuti la mutali'isi'axu maulixa'a, lexe ane'i laixene'isi. Xe muavuti la muvikala lexe, “Ngene'e tei, la ngea'aloxenixu aululu maminge soxu lexe anu a uxoxoolu no tuala, la loxovaa noxou? Anu a uxoxoolu laixenusi?”

28 Xe ane'i miavuti mivikalanu vimo'a ne lexe, “Tilasixe, mamixe ne anu soxu a uxoxoolu mo laixenusi.” Xe miavuti la mitulutulu no tava'a vo'uvo'uxu mulu'e no talaxu la, sou mitangatulu mulu'elai noxou sou mitoxonu la.

29 Xe Iosepu iou muvaxa la mumaisou vimou soxu e ualasou lexe Beniamini anu vimou manina ilou neni'a vilesisi la sou mutali'isi'a lexe, “Vivinge sou ane kaluxusinge e, ngevikalalelixu ano 'o?” La sou iou mulai noxou Beniamini sou muvikalanu lexe, “'Ei soxu, Lataua uxoo noxine mo ualusine.” 30 Xe muavuti no lia noxi'a ta vimovimou ne la mulai avile no nano no taasou xo mumaisou vimou Beniamini la tanuxu misevile. La 'ala'alai sou utama no ie'i. La sou ane anu mulai mutalumeiou tamaxu no anu sou mutama.

31 Mutama mukalu, la mulai mu'uinu iou. Ka sou muuatulai no ale ne la tamaxu mulokolaxu ne ia pekia'usi sou muvikalane'i ta mitema noxou sou ino'u la'ilali une'e sou ulosi'a.

32 Ane'i mino'u la'ilali ne mukalu la sou Iosepu ne, milai mimuxaxu na'u no luu vile va'axu sou anusisi mulai muxolu sou muno'u. Xe ta vimovimou ne, milai mikaline'i sou mi'ani no luu vile va'axu mo. Xe ta mitema se'i ne Aixiputo e ilo'a Iosepu ixoxolu no tani noxou ne, mi'ani va'axu mo, xo ta Aixiputo ne, ilavusou ilo'a ta Evalaio ixolu ipipita sou i'ani'ani uasi. 33 Ane'i ilo'a ta Evalaio ixolu ipita la, ane ne masua misevile noxi'a ta Aixiputo. Xe ane'i ta vimovimou mimaisou mine ane'i mixoluxolu loxo no talaxa'a mulai noxou, la mikuluke, la ie'i mukaai'a ngatongato'o. Xo ane'i mita'olu sou mi'ani ne la, vimo'a ane laposalaxu muxolu tei, ka sou vimo'a ane tameisi'a ka tatalusi'a xoo la sou mulai mutalo noxou Beniamini. 34 Xe ta mitema sou xaixai noxou anu Iosepu miavuti la, ivavauxa'a ta vimovimou la'ilali ne molu loxo no luu sou na'u la'ilali ne, ulalai loxo noxi'a. Vimo'a soxu e Beniamini ne, mivau xou la'ilali piena misevile loxo umomomo noxi'a ta mitema ta'uve sou i'ou. Ane'i ilo'a Iosepu mi'ani mo miie.